
Ниту скршениот ВАР-монитор не го спаси Динамо Букурешт од пораз. Петролул победи со 1-0 на гостувањето во романското првенство, на натпревар што го одбележа навивачки инцидент пред крајот на првото полувреме.
Домашните навивачи ја прекинаа ВАР-проверката токму кога судијата разгледуваше дали треба да покаже на белата точка за гостите. Тие го повлекоа кабелот од мониторот, по што уредот падна на атлетската патека и се скрши.
Следуваше застој од 15 минути, додека се оспособи опремата и се доврши прегледувањето на спорната ситуација во шеснаесетникот на Динамо. Инцидентот не ја спречи судиската одлука: по проверката беше досуден пенал за Петролул.
Одговорноста ја презеде Дан Н’Лундулу, кој погоди во 12. минута од судиското надополнување на првиот дел. Неговиот удар од белата точка остана единствениот гол до крајот и им ги донесе трите бода на гостите.
За Динамо ова е болен неуспех во борбата за врвот. Тимот од Букурешт е втор на табелата, со ист број бодови како водечката Крајова, додека Петролул со оваа победа се искачи на четвртата позиција.
Фото: Tomas Castelazo / Wikimedia Commons, CC BY-SA 3.0