Осум гола, црвен картон и два одбранети пенала – гостувањето на Лацио кај Сасуоло понуди вистински спектакл, но радоста им припадна на римјаните. Со убедливи 6-2, тие продолжија со силните настапи на врвот во Серија А, откако во ова коло влегоа бодовно израмнети со Интер.
Стефано Турати ги запре ударите од белата точка на Матија Ѕакањи и Давиде Фратези, но ниту тоа не беше доволно за домаќините да избегнат тежок пораз. Сасуоло дополнително си ја отежна задачата со исклучувањето на Кристијан Торствет во 32. минута.
Уште првите 16 минути најавија натпревар што нема лесно да се заборави. Кенет Тејлор го отвори резултатот во втората минута, а Торствет израмни во седмата по додавање на Џош Доиг. Потоа Густав Исаксен во 13. и Романо Флоријани Мусолини во 16. минута го одведоа Лацио до предност од 3-1.
За Флоријани Мусолини тоа беше прв погодок во Серија А, потврден по проверка со ВАР, откако првично беше означен офсајд. Четири гола во воведните 16 минути во италијанското првенство немаше уште од дуелот Аталанта – Болоња во април 2019 година.
Торствет од стрелец стана еден од главните виновници за проблемите на Сасуоло. Поради опасен старт врз Ѕакањи доби директен црвен картон, оставајќи ги соиграчите со играч помалку. Сепак, Себастијано Еспозито во 43. минута намали на 2-3 и накратко ја врати неизвесноста.
Лацио не дозволи со таа разлика да се замине на одмор. Во првата минута од судиското продолжение, Исаксен го пронајде Ѕакањи, кој со глава погоди за 4-2.
Продолжението му припадна на Тиџани Нослин. Откако Турати во 51. минута му одбрани пенал на Ѕакањи, Нослин четири минути подоцна ја зголеми предноста со прецизен удар кон подалечниот долен агол.
Голманот на Сасуоло повторно беше успешен од белата точка во 61. минута, овојпат против Фратези. Но, за ударот на Нослин од далечина во 66. минута немаше решение: топката заврши во горниот агол за конечни 6-2.
Римјаните имаа можност и за седми погодок, но Матео Канчелиери со глава биеше непрецизно. Сасуоло, кој во претходните четири кола освои само еден бод, немаше сили да го ублажи поразот.
Гостите имаа и гласна поддршка од трибините. Навивачите на Лацио, кои ги бојкотираат домашните натпревари во знак на протест против претседателот Клаудио Лотито, на ова гостување беа толку бројни што речиси ги надбројаа домашните приврзаници.
Фото: SonoGrazy / Wikimedia Commons, CC BY-SA 4.0
Учество во игри на среќа е дозволено за лица со 18+ години. Играј одговорно!