Роналдињо се враќа на 46 години: Кој е клубот што го носи повторно на терен?

Равена го чека Роналдињо за дербито со Форли на 15 ноември. Според најавата на клубот, 46-годишниот Бразилец ќе се врати во натпреварувачкиот фудбал на стадионот „Бруно Бенели“, каде што средбата е закажана за 17:30 часот по локално време.

За поранешниот освојувач на „Златната топка“ тоа би бил прв официјален настап по разделбата со Флуминенсе во 2015 година. Колкава минутажа ќе добие против соседскиот ривал, ќе одлучи тренерот Андреа Мандорлини.

Пристигнувањето на Роналдињо беше објавено во јуни, по што следуваше претставување во Мајами. Во август, околу 6.000 навивачи го поздравија на настан покрај плажата во Марина ди Равена.

Неговата врска со Равена не завршува со дресот – Бразилецот поседува и малцински удел во клубот. Според „Гол“, желбата е последниот погодок во кариерата да го постигне токму на „Бенели“, а проектот е поврзан и со промоција на неговиот бренд Р10. Во продажба е и ограничена серија дресови „Равена x Роналдињо“, по цена од 129 евра.

Зад оваа приказна стои клуб основан во 1913 година, од градот во Емилија-Ромања познат по византиските мозаици и јадранските плажи. Равена играше во Серија Б во текот на 1990-тите и 2000-тите, но банкротот во 2012 година ја врати во аматерскиот фудбал. Оттаму почна обновата и патот назад до Серија Ц.

На претседателската функција е Ињацио Чипријани, член на познатото семејство од ресторанскиот и угостителскиот бизнис. Потпретседател е Ариедо Браида, некогашниот спортски директор на Милан.

И спортскиот сектор има препознатливи имиња. Мандорлини, роден во Равена, беше дефанзивец на Интер и шампион на Италија во 1989 година. Како тренер се истакна со подемот на Верона од третиот ранг до Серија А. Клупата на Равена ја презеде во февруари 2026 година по отказот на Марко Маркиони, а довербата ја задржа и за оваа сезона. Неговиот син Давиде е спортски директор.

Целта на Равена е враќање во Серија Б, но конкуренцијата веќе направи притисок. По десет натпревари тимот е втор во групата Б на Серија Ц со 20 бода: шест победи, две ремија и два пораза.

Лидерот Специја, кој испадна од Серија Б, има осум бода предност, а минатата недела славеше со 1-0 токму на „Бенели“. Третопласираниот Гросето е само еден бод зад Равена.

Директен пласман во повисок ранг обезбедува единствено победникот на групата, додека останатите екипи од горниот дел на табелата шанса бараат преку плејофот. Форли, против кого е најавено дебито на Роналдињо, се наоѓа на 14. место. Присуството на Бразилецот носи очекувања ова дерби да привлече рекордна гледаност за Серија Ц.