Двата торински клуба ги дочекуваат следните предизвици со сосема различно расположение. Јувентус има сè подолг список на повредени, додека Торино слави трета последователна победа во Серија А и пласман над градскиот ривал. Тоа е една од главните теми на италијанските спортски насловни страници.
„Тутоспорт“ ги издвојува новите кадровски проблеми кај „бјанконерите“. Нико има повреда на солеусот, а Челик проблем со задната ложа, поради што двајцата ќе отсуствуваат до паузата. Неизвесен за дуелот со Лече е и Сар, кој се мачи со адукторот. Весникот наведува дека фудбалерите на Јувентус веќе пропуштиле вкупно 59 натпревари поради повреди.
На другата страна од градот, Торино повторно ја разбуди еуфоријата. Фиц-Џим, Белгали и Влашиќ беа стрелци во победата над Монца, со која тимот барем за една вечер стигна до шестото место и предност од два бода во однос на Јувентус. Три првенствени победи во низа Торино немал седум години.
Посебно задоволство кај Абате предизвикала реакцијата на неговиот тим по израмнувањето на Варела за 1-1. Победата беше прославена со навивачите под трибината „Маратона“, а Влашиќ истакна колку му значеле враќањето меѓу стрелците и радоста на публиката. Јуриќ, пак, призна дека Торино бил подобриот противник.
„Кориере дело Спорт“ носи и интервју со Стефано Пиоли, кој сака нова шанса за докажување, по можност во Италија. Тренерот, кој неодамна наполни 61 година, ја презема одговорноста за грешките во Фиренца и смета дека сè уште има многу да понуди. Титулата со Милан ја издвојува како врв на својата кариера.
Меѓу темите на „Газета дело Спорт“ е и тренерската пресметка меѓу Масимилијано Алегри и Џан Пјеро Гасперини: пристапот насочен кон резултатот на едната страна, наспроти интензитетот што го бара Гасперини на другата.
Учество во игри на среќа е дозволено за лица со 18+ години. Играј одговорно!