Вербален конфликт помеѓу Килијан Мбапе и Осман Дембеле пред пресудата за освојувачот на Златната топка, го прокоментира Жером Ротен, поранешен фудбалер и сегашен аналитичар за “РМС Спорт”. Според неговите зборови, се чини дека постои сериозен раздор меѓу редовите на францускиот национален тим.
“Дембеле го прифати тоа многу лошо и веројатно е лут на Килијан Мбапе. За него, тоа е некаков вид предавство. Ова се тешки зборови, но тој навистина така го доживува. И не е единствениот. Истото мислат и луѓе од кругот на Осман, соблекувалната на ПСЖ и неговите колеги од репрезентацијата”, изјави Ротен, поранешен играч на ПСЖ и француски репрезентативец.
Сè започна од интервјуто на Килијан Мбапе за France Football. Мбапе зборуваше за својата кандидатура за Златната топка и го спореди својот пат со оној на Дембеле. За Дембеле, освојувач на наградата Ballon d’Or за минатата година, изјави дека секогаш бил сметан за голем талент, додека за себе кажа дека отсекогаш бил “избраниот” играч:
“Дембеле? Секогаш беше сметан за талентиран играч. Јас, пак, отсекогаш ме гледаа како избран. Многу рано ја достигнав врвната точка. Осман имаше поинаков пат, обележан со повреди, но успеа да се врати.”
Токму изразот “избран” стана проблем. По победата на ПСЖ против Брест, Дембеле беше запрашан за трката за Златната топка. Неговиот одговор очигледно реферираше на зборовите на Мбапе:
“Знаете, јас секогаш бев на крајот од класата, напорно работев. За време на целата кариера не кажав ништо, туку неверојатно многу работев. Како што кажав, никогаш не бев избран. Но, неверојатно многу работев.”
Репрезентативци на страната на Дембеле?
Ротен предупредува дека ситуацијата може да доведе до раздор во репрезентацијата, која неодамна ја предводи Зинедин Зидан. “Ми кажуваат дека многу репрезентативци повторно не ги разбираат неговите изјави. Повеќе се на страната на Дембеле отколку на Мбапе. Иако е ист тим, изгледа дека се формирале два табора.”
“Многу ме интересира како ќе изгледа ракувањето на Осман Дембеле и Килијан Мбапе на следниот собир на репрезентацијата. Мислам дека ќе биде исклучително напнато”, истакна Ротен.
Дел од соблекувалната на францускиот тим ги толкува зборовите на Мбапе како потценување на останатите членови на тимот.
“Импресијата создадена на Светското првенство денес е уште појасна. Многу играчи имаа проблеми со однесувањето и изјавите на Мбапе, тоа е факт. Тој многу од нив сврте против себе во рамките на репрезентацијата. Светското првенство заврши како што заврши, а кога сте најдобар стрелец и се однесувате примерено, како што Килијан тогаш го стори, критиките во тимот се намалуваат. Сепак, ваквите изјави сега ќе му донесат штета”, објасни Ротен.
Учество во игри на среќа е дозволено за лица со 18+ години. Играј одговорно!