Сомнителни облози на СП: За време на турнирот се уплатени вкупно 240 милијарди долари

Меѓународното советодавно тело „Група на Копенхаген“ објави седум предупредувања за можни манипулации на натпревари поради сомнителни шеми за обложување кои биле забележани за време на Светското првенство во САД, Канада и Мексико. Група на Копенхаген се занимава со откривање и спречување на местење на натпревари и други манипулации во спортските натпревари. Наодите се резултат на надзор на сите 104 натпревари одиграни на турнирот.

Според извори запознаени со содржината на извештајот, кој го пренесува „The Athletic“, меѓу ситуациите кои предизвикале сомнеж се наоѓа црвениот картон кој Јужноафриканецот Темба Зване го добил во 84. минута од натпреварот против Мексико, како и уплатите од 4,8 милиони долари на американската крипто-платформа Polymarket на облог дека Шпанија нема да го победи Зеленортски Острови. Натпреварот заврши 0:0.

Таму е и одложувањето на одлуката на ВАР тимот од три и пол минути при поништувањето на голот на Шпанецот Феран Торес во победата од 4:0 против Саудиска Арабија.

Извори наведуваат дека наодите детално опишуваат дека „Polymarket“ на 2 јули отворил пазар со прашањето: „Дали Фоларин Балоган ќе игра против Белгија?“. Тоа се случило истиот ден кога американскиот напаѓач добил црвен картон против Босна и Херцеговина во осминафиналето. Дисциплинската комисија на ФИФА дури на 5 јули потврдила дека Балоган може да игра бидејќи му е укината суспензијата.