Кога во септември влезе во игра против Бирмингем, Натали Бјорн доби нешто многу поважно од неколку минути на теренот. За дефанзивката на Челси тоа беше крај на долг период исполнет со болка, неизвесност и прашањето дали повторно ќе може да игра како порано.
Шведската репрезентативка се врати во 87. минута, а пречекот од трибините најпрво ја збунил. Дури кога ги забележала насмевките на соиграчките, сфатила дека аплаузите се за неа. На трибините биле и нејзината мајка и сестра.
„Си помислив: успеав, конечно сум назад. По сè низ што поминав, повторно сум тука. Во тој момент почувствував дека вредеше секој тежок ден од рехабилитацијата“, раскажа Бјорн во разговор за „Скај спортс“.
Патот до тој момент почна со повреда на задната ложа во декември 2025 година. По три месеци пауза, таа се врати за финалето на Лига купот против Манчестер јунајтед во март. Но, наместо долгоочекуван нов почеток, следуваше уште еден удар: по само 120 секунди мораше повторно да го напушти теренот.
Овојпат проблемот беше во листот, а новата повреда ја оддалечи од фудбалот уште шест месеци. Денот во кој Челси освои трофеј за неа остана мешавина од радост и солзи.
„Тешко е да се справиш со тоа: се враќаш, излегуваш по две минути, освојуваш пехар, а истовремено плачеш. Емоциите беа целосно измешани“, објасни таа.
Првата рехабилитација ја минувала со оптимизам, уверена во сопственото тело и во помошта од клубот. Втората била многу потешка. Имало денови кога не сакала ниту да влезе во вежбалницата, а повторното учење на основните движења ја натерало да се сомнева во враќањето на претходното ниво.
Особено болно било сознанието дека непосредно пред повредите ја играла, според сопствената процена, најдобрата сезона во кариерата.
Голема улога во закрепнувањето имал физиотерапевтот Енди Волинг. Бјорн истакна дека тој ѝ оставал простор да ги покаже и тешките емоции, без постојано да мора да изгледа силно. Поддршката од соиграчките, кои редовно ја посетувале во вежбалницата, исто така ѝ помогнала да продолжи.
Денес повторно чувствува сила и сигурност, но вели дека најголемата промена е во начинот на кој го доживува секојдневието. Наместо да размислува само за следниот голем натпревар, научила да го цени и обичниот тренинг.
„Се чувствувам добро и на тренинзите и на натпреварите на кои добивам минути. По толку долго отсуство, научив повеќе да го ценам телото. Најважната лекција е да уживам во секој ден“, порача таа.
Враќањето носи и лидерска одговорност. Бјорн летово беше избрана за една од заменичките на капитенката Ерин Катберт, заедно со Луси Бронз. На 29 години, Швеѓанката својата улога не ја гледа низ најголем број голови или одземени топки, туку низ постојаноста.
„Сакам екипата да знае дека може да се потпре на мене. Тимот секогаш ми е пред сопствениот интерес и секоја задача што ќе ја добијам сакам да ја исполнам целосно“, истакна дефанзивката.
Нејзиниот камбек се совпадна со добрите настапи на Челси, кој сезонава е без пораз во сите натпреварувања и има примено само три гола. Бјорн ја нагласува важноста на интензивните тренинзи и на подоброто меѓусебно разбирање во составот на Соња Бомпастор.
По непоразената прва сезона под водство на Бомпастор, кампањата 2025/26 донесе поинакви тестови. Според Бјорн, токму реакцијата на тешките моменти покажува колку е силен еден тим, а направените грешки мора да станат лекција.
Следниот предизвик е Кристал Палас, кој во септември одигра 0-0 со Арсенал на „Емирати“. За Бјорн тоа е нова можност да собира минути, но предупредува дека Челси мора веднаш да го наметне својот ритам.
„Во фудбалот сè е можно. Мора од почеток да притиснеме и да ја играме нашата игра“, заклучи таа.
Учество во игри на среќа е дозволено за лица со 18+ години. Играј одговорно!