Ова е приказната како Трамп го поништи црвениот картон на американскиот фудбалер

Само неколку дена по исклучувањето во натпреварот против Босна и Херцеговина, американскиот напаѓач Фоларин Балогун му беше укината суспензијата, што му овозможува да игра во клучниот натпревар од осминафиналето на Светското првенство против Белгија.

Одлуката следеше по четиридневната лобирачка кампања координирана од Белата куќа, која вклучуваше директен повик од претседателот Доналд Трамп до челникот на ФИФА Џани Инфантино, што предизвика гнев во европските фудбалски кругови, пишува Политико.

Акцијата за поништување на Балогуновата суспензија започна само неколку минути откако водечкиот стрелец на американската репрезентација во средата доби црвен картон поради невнимателен старт. Ендру Џулијани, извршен директор на Работната група на Белата куќа за Светското првенство, веднаш го информираше претседателот Трамп за казната. Трамп и Џулијани со месеци редовно разговараа за турнирот, а по почетокот на натпреварувањето тие разговори се интензивираа.

До средата навечер Белата куќа се вклучи во оспорување на одлуката, која и некои фудбалски аналитичари ја сметаа за престрога. Џулијани, министерот за трговија Хауард Лутник и високи претставници на Американската фудбалска асоцијација, кои ги следеа натпреварите на стадионот Лејвис, покренаа план за жалба, иако таквите жалби на Светските првенства се извонредно ретки.

Следуваа четири дена координирано лобирање и правни маневри. Во четвртокот, Трамп лично го повика претседателот на ФИФА Џани Инфантино, со кого во изминативе осум години изградил пријателска врска. Трамп се распрашуваше за правилата и основите за суспензијата. Инфантино го сослуша, но не даде никакви ветувања. ФИФА одби да ги потврди деталите од разговорите, повторувајќи дека одлуката ја донела независна дисциплинска комисија.

Случајот брзо се движеше низ каналите на ФИФА. Емилио Гарсија, кој ги надгледува правните работи на светската фудбалска организација, стана клучна фигура во советувањето на Инфантино. Во неделата пристигна одлуката: Дисциплинската комисија на ФИФА објави дека суспензијата на Балогун од еден натпревар се одложува на пробен рок од една година. Трамп веднаш на својата социјална мрежа Truth Social ѝ се заблагодари на ФИФА “што ја направи правилната работа и исправи една голема неправда”.