ФИФА во проблем: Две огромни земји нема да имаат пренос од Мундијалот?!

Со наближувањето на почетокот на Светското првенство во фудбал кое почнува на 11 јуни, воодушевувањето расте, но светските фудбалски власти – ФИФА се пред неочекуван предизвик. И покрај склучувањето договори за телевизиско покривање со 175 држави, две од најнаселените земји во светот, Кина и Индија, кои сочинуваат приближно 36 проценти од светското население, сè уште немаат обезбеден пренос.

Според достапните информации, во Индија се појавиле потешкотии во преговорите, додека Кина сè уште не го финализирала договорот со ФИФА. Ова значи дека засега, гледачите од овие две држави нема да можат да ги следат натпреварите во живо, а ќе недостасуваат и придружни емисии посветени на турнирот. Особено е невообичаено што сè уште нема официјално соопштение за склучување на договори на кинескиот и индискиот пазар.

Овој развој на настаните претставува сериозен удар на глобалната видливост на натпреварувањето. ФИФА претходно ја истакнуваше важноста на кинескиот пазар, кој за време на Светското првенство во 2022 година учествуваше со 49,8 проценти од вкупното време на гледање на дигиталните и социјалните платформи на глобално ниво.

На претходните светски првенства во 2018 и 2022 година, кинеската државна телевизија CCTV ги добиваше правата многу порано, а неделите пред турнирот се емитуваа промотивни материјали и реклами од спонзорите. Една од можните причини за моменталниот застој можеби е слабеење на интересот кај кинеската публика.

Во Кина се надеваа дека нивната репрезентација ќе учествува на натпреварите, особено откако беше зголемен бројот на учесници на 48, но бидејќи тоа не се оствари, интересот е наводно помал од очекуваното. За ФИФА ова е значајно прашање, бидејќи кинескиот пазар се смета за клучен за комерцијалниот успех и глобалниот дострел.

Според извори, ФИФА треба да ги комплетира сите документи и да ги потпише договорите за телевизиските права до 5 јуни. И покрај овие пречки, во водечкиот фудбалски орган веруваат дека ова би можело да биде најгледаното Светско првенство во историјата, но евентуалниот недостиг на пренос во Индија и Кина би бил сериозен удар на тие амбиции.