Ливерпул претера со цените, Барса задоволно ги „трие рацете“: Договорот од 80 милиони е подготвен!

Ливерпул дефинитивно претера со сумите што ги издвојува за засилувања и последните неколку трансфери никако не им се исплатиле. Сега се подготвени за уште еден неверојатен трансфер и ќе платат 80 милиони евра на тимот на Барселона за трансферот на репрезентативецот на Франција, Жил Кунде.

Ливерпул само во тековната сезона ги направи трите најголеми трансфери во историјата на клубот. Апсолутниот рекорд е доведувањето на Александер Исак од Њукасл за 145 милиони евра, Флориан Вирц беше платен на Баер од Леверкузен 125 милиони, а Хуго Екитике на Ајнтрахт 95 милиони евра.

Секако, промашување беше и Дарвин Нуњез кој во 2022 година беше платен 85 милиони евра, но, се разбира, тука се и некои многу добри примери како што е Доминик Собослаи кој игра фантастично, а беше платен 70 милиони евра.

Плановите на „црвените“ за следното лето веќе започнаа. Веќе е договорен стоперот на Рен, Жереми Жаке во трансфер вреден 63 милиони евра, а наскоро би можел да се случи и трансфер вреден дури 80 милиони.

Таа сума тимот од Енфилд е подготвен да ја понуди на Барселона за францускиот дефанзивец Жил Кунде. Тешко е да се верува дека шпанскиот шампион ќе ја одбие оваа сума.

Кунде е добар играч, но не е некој без кого Барселона не може. Сумата од 80 милиони евра би им дојде добро на каталонскиот гигант кој планира неколку засилувања и нема да биде никакво изненадување ако кажат ‘да’.