Милер сепак ја одложува одлуката за репрезентативна пензија

После елиминацијата во групната фаза и натпреварот против Костарика, Томас Милер изјави дека тоа е неговиот последен натпревар во дресот на Германија, но очигледно таа изјава фудбалерот на Баерн Минхен ја дал со „жешка глава“.

Неколку дена подоцна Милер изјави дека не донел конечна одлука околу репрезентативната кариера. Милер испрати и порака до фановите преку социјалните мрежи.

„Навистина е тешко да се поднесе она што се случи на Светското првенство. Имам кариера со големо искуство, победи и неуспеси.

Сепак, за ова ќе ми треба повеќе време да го пребродам. Болката е навистина голема и боли повеќе од било кога“, објави Милер.

Настапот со Германија на Светското првенство за Милер беше четврти. Во 2010 и 2014 постигна по пет гола, но во Катар сега и Русија пред четири години не се запиша во листата на стрелци.