Бразил го одмараше Нејмар, Еквадор дојде до бод 🎥

Во последното коло од групната фаза на Копа Америка, Бразил и Еквадор ги поделија бодовите одигрувајќи реми 1:1.

Селекторот на Бразил Тите си дозволи да излезе со малку комбиниран состав, па Нејмар целиот натпревар го помина на клупата за резерви. Првотимците Ричарлисон и Фред исто така одмараа, но „Кариоките“ и така го задржаа првото место во групата.

Во првото полувреме единствено што е вредно да се спомене е голот на Едер Милитао во 37. минута. Стоперот на Реал беше највисок после нафрлувањето на Евертон после што голманот Галиндес мораше да ја вади топката од својата мрежа.

На почетокот на второто полувреме малото опуштање во одбраната на Бразил го искористи Анхел Мена кој погоди откако топката со глава ја спушти Енер Валенсија.

Освен овие два гола скоро и да не видовме некое друго возбудување. Двете екипи беа затворени и поделија по бод.