Гвардиола го спореди Мурињо со Џордан

Дербито на колото овој викенд во Премиер лигата го играат Тотенхем и Манчестер Сити, натпреварот се игра утре од 17:30 часот.

Ова ќе значи и средба на старите ривали Пеп Гвардиола и Жозе Мурињо. Судирот на Пеп и Мурињо ќе биде прв откако Португалецот седна на клупата на Тотенхем. Нивните натпревари имаа најголем сјај кога Пеп ја водеше Барселона, а Мурињо Реал Мадрид. Од тогаш Гвардиола се изгради како еден од најдобрите светски тренери, додека репутацијата на Мурињо падна најмногу поради лошата епизода во Манчестер Јунајтед.

Сепак, кога Гвардиола зборуваше за Мурињо порача дека на Жозе мора да му се суди по тоа што го направил во целата кариера.

„Вредноста на Жозе не може да се мери во само една сезона бидејќи станува збор за човек со огромно искуство. Морате да ја гледате целата негова кариера, последните 15-20 години. Секој менаџер има добри и лоши моменти. Жозе е туа 20 години и тоа мора да се почитува, тешко е да се одржиш на такво ниво толку долго“.

„Во спортот повеќе ќе изгубиш отколку што ќе победиш. Мајкл Џордан има шест титули шампион на НБА, повеќе губел отколку што победувал, но станува збор за неверојатен спортист. Поради тоа секогаш сум бил воодушевен од она што го прави Жозе“, изјави Гвардиола.