Сведок на хоророт: Бев на кафе, а сопственикот ни викна – заминувајте!

Навивачите на Динамо и АЕК имаа жестока пресметка во Атина пред вечерашниот натпревар од третото квалификациско коло за Лигата на шампионите.

Грчката полиција потврди дека 22-годишен навивач на АЕК го загубил животот, но голем е бројот на повредени и уапсени. Последните информации се дека биле уапсени 96 лица, од нив дури 82 биле навивачи на Динамо.

Сега за грчките медиуми зборуваше сведок на инцидентот.

„Бев на кафе со тројца пријатели кога дојдоа некои луѓе, а сопственикот ни кажа дека сакаат да прават проблеми. Само ни викна: Заминувајте, ќе го затвориме локалот, ризикот е преголем“.

„Одејќи до автомобилот видов како неколку луѓе ни се приближуваат, држеа палки и уште некои други работи. Сфатив дека нема да стигнам до автомобилот, па се свртев и си заминав. Го скршија предното и задното стакло, нас не не удрија, но слушнав дека други настрадале. Во локалот беа и повеќе луѓе“, раскажал неименуван Грк.