Салах: Останувам во Ливерпул и следната сезона

Мохамед Салах ги отстрани сите дилеми за тоа каде ќе игра следната сезона и ги израдува навивачите на Ливерпул.

Иднината на Салах е главна тема на „Енфилд“ веќе подолго време бидејќи влезе во последната година од договорот.

Преговорите за договорот се одолговлекуваат веќе неколку месеци, но Салах изјави дека сигурно ќе остане во Ливерпул и следната сезона.

„Воопшто не сакам да бидам себичен, дури и го кажав тоа пред околу два месеци. Сега се работи за тимот, ова е навистина важна недела за нас и јас сум фокусиран само на тимот. Ова е многу важна недела за нас и сакам да ја освојам Лигата на шампионите повторно“.

„Јас сум само фокусиран на тимот, не сакам да зборувам за договорот сега бидејќи имаме долго време. Сигурно останувам следната сезона, тоа е јасно. Останувам следната сезона, па да видиме потоа“, рече Салах.

Сепак, Египќанецот не се изјасни дали ќе го продолжи договорот или следното лето ќе замине без обештетување.