Само шест погодоци во сениорската кариера му беа потребни на Калил Фајад за да постигне гол што ќе се памети. Францускиот играч за врска на Хајдук изведе прекрасни ножички во дуелот со Истра, кој заврши 2:2 во 11. коло од хрватското првенство.
Моментот за одбележување се случи уште во седмата минута. По изведен корнер и мешаницата пред противничкиот гол, 22-годишниот Фајад се фрли наназад и со акробатски удар ја испрати топката во мрежата. Следуваше бурна прослава со соиграчите за еден од најубавите погодоци од почетокот на сезоната.
Неговото влијание врз натпреварот не заврши со тој потег. Фајад му асистираше и на Микеле Шего, па средбата со Истра му донесе најбогат индивидуален учинок откако го носи дресот на Хајдук. Претходно погоди и на дебито, во победата од 4:0 на гостувањето кај Рудеш.
Хајдук го доведе од Монпелје во финишот на преодниот рок за 250.000 евра, а досега за сплитскиот тим има девет настапи. Неговата проценета вредност на Трансфермаркт изнесува 1,5 милиони евра.
Роден на 9 јуни 2004 година во Монпелје, Фајад до преселбата во Хрватска ја градеше целата кариера во клубот од родниот град, кој моментално игра во вториот француски ранг. Првиот професионален договор го потпиша пред три години.
За првиот тим на Монпелје запиша 67 настапи во Лига 1 и уште 20 во Лига 2 минатата сезона. Во тие 87 сениорски натпревари постигна четири гола и забележа три асистенции. Има француско и мароканско државјанство, а во младинските категории ја претставуваше Франција, сè до селекцијата до 20 години.
Учество во игри на среќа е дозволено за лица со 18+ години. Играј одговорно!