Патрик Виера повеќе не е тренер на Кристал Палас

Легендарниот Патрик Виера доби отказ во Кристал Палас по серијата слаби резултати во лондонскиот клуб.

Во овој момент тимот се наоѓа на 12-тото место, но има само три бода предност во однос на екипите од опасната зона. Сепак, тоа беше доволно предупредување за претседателот Стив Периш да реагира и да донесе одлука за промена на клупата.

„Одлуката ја носиме со тешко срце. Резултатите во последните месеци придонесоа да се најдеме во незавидна позиција и мораше да направиме промена за да го задржиме премиерлигашкиот статус. Со Патрик Виера поминавме прекрасни моменти и игравме полуфинале во ФА Купот на „Вембли“, сепак таа соработка мора да биде прекината“, објави Периш.

Промената на клупата во Палас доаѓа пред натпреварот со Арсенал во недела. Наследникот на Виера ќе биде именуван по репрезентативната пауза.