Настани кои ја одбележаа 2018 година!

Последниот ден од годината е одлична можност да направиме ретроспектива на нашето „дружење“ со вас читателите во изминатите 365 дена.

„Спортски.мк“ и оваа година беше еден од најчитаните спортски медиуми во Македонија, па нашата редакција искрено ви се заблагодарува на довербата која што секојдневно ни ја давате.

Годината која изминува беше многу богата со спортски настани и случувања, но сепак некои вести предизвикаа особен интерес кај Вас читателите.

Меѓу најчитаните вести и оваа година беа „Трансферите во живо“. Нашата редакција во текот на целиот летен преоден рок се труди навремено и точно да ве информира за сите трансфер новини и шпекулации, а бројките покажуваат дека тоа е најомилената „рубрика“ за Вас читателите. Секако, трансферот кој привлече најголемо внимание ова лето беше тој на Кристиано Роналдо во Јувентус.

Особен интерес оваа година предизвика борбата помеѓу Хабиб и Мекгрегор. Боречкиот спектакл ја одбележа спортската година, а нашата редакција навремено ви ги пренесе сите детали околу борбата и тоа што се случуваше после неа.

Секако, нашето дружење со вас читателите беше интензивно и за време на Светското првенство во Русија. Во текот на целиот Мундијал нашата редакција ви нудеше најави, анализи, извештаи и ве известуваше за сите инетерсни детали во текот на натпрварите. Кога на овие простори се споменува Мундијалот 2018 тука помислуваме на големиот успех на репрезентацијата на Хрватска.

За жал, меѓу најчитаните настани оваа година беше и трагичната смрт на Давиде Астори. Смртта на капитенот на Фиорентина ја потресе спортската јавност ширум светот, па и кај нас.

Финалите во Лигата на шампиони како и секоја година беше настан кој предизвика огромно внимание кај Вас читателите. Натпреварот меѓу Реал Мадрид и Ливерпул беше возбудлив и богат со интересни детали. Секако, спектакуларниот гол на Бејл и грешките на Кариус беа во фокусот на вниманието.

Големо внимание исто така предизвика и повредата на Салах за време на финалето и препукувањата со Серхио Рамос после тоа. Изненадното заминување на Зидан од Реал Мадрид предизвика големо внимание. Ние навремено ве известувавме за сите шпекулации околу новиот тренер и официјализацијата на Лопетеги пред самиот старт на Мундијалот.

Во Македонија не можеме да не го споменеме големиот подвиг на 12 годишниот Марко Пејчиновски кој со инфракт на нозете го преплива Охридското езеро.

За крај, нашата редакција ви посакува среќна Нова година, со надеж дека следната година ќе се дружиме во уште поголем број.