Мурињо: Сите имаат лоши периоди, а само нас не напаѓаат

Tимот на Тотенхем влезе во мини криза од два порази во низа во Премиер лигата откако вчера неочекувано над тимот на Мурињо славеше Брајтон (1:0).

После натпреварот менаџерот Жозе Мурињо не беше расположен, а отворено зборуваше и како тој гледа на работите и односот на медиумите кон неговиот тим.

„Секој клуб има добри и лошо моменти. Сите доаѓаат во период кога имаат серија лоши резултати, но само нас не напаѓаат. Видов тага на лицата на играчите. Сигурен сум дека ќе пронајдеме начин да излеземе од оваа криза. Половина е од сезоната и допрва не чекаат важни натпревари. Тука е и заморот, но играчите даваат се од себе. Не сакам никого да обвинам. Вакви работи како што кажав им се случуваат на сите“, изјави Мурињо.

Мурињо што побрзо мора да го крене расположението на екипата бидејќи веќе во четвртокот Тотенхем го чека дерби со Челзи.