Гвардиола откри што им кажал на своите играчи откако Звезда поведе со 1:0

ЕВРОПСКИ ШАМПИОН Манчестер Сити ја започна одбраната на титулата со победата од 3:1 на домашен терен против Црвена Звезда. Шампионите на Србија се бранеа во текот на целото прво полувреме, практично не можеа да се извлечат од своите 16 метри, а Граѓаните упатија дури 22 удари кон голот на Звезда во првите 45 минути.

И покрај тоа, Звезда погоди прва. Букари го шокираше „Етихад“ во 45. минута, но не требаше долго за Сити да го смени резултатот во вториот дел и да спречи сензација.

Тренерот на Сити, Пеп Гвардиола, по натпреварот изјави дека е задоволен од играта на неговиот тим.

„Одигравме навистина добро, но головите не ни одеа. Но, бевме доследни и на крајот го добивме натпреварот“, изјави Гвардиола за ТНТ и продолжи:

„Да имаш 22 удари кон голот во првото полувреме значи дека играш навистина добро. Напаѓачите мораа да постигнат дел од тоа. Да постигневме два гола веднаш на почетокот, сè ќе беше поинаку. Како против Вест Хем, ние одигравме фантастичен натпревар. На полувремето не бев премногу загрижен што губиме со 1-0. Им кажав на момците дека не треба да кажеме дека играме лошо. Им реков да се смират, да заборават на резултатот и дека ќе се вратиме. Така се случи“.

Херој на дуелот е Џулијан Алварез, кој ги постигна првите два гола за Сити.