„Бернардо Силва е еден од најдобрите фудбалери кои сум ги видел во животот“

Maнчестер Сити вчера го понижи Реал Мадрид славејќи победа од 4:0 и со вкупни 5:1 ги елиминираа „кралевите“ од најелитното европско натпреварување.

Пеп Гвардиола секако беше пресреќен по победата на неговиот тим. Како што изјави шпанскиот стратег, поразите на Сити од минатата сезона биле посебен мотив да го дадат најдоброто од себе.

„Во овие завршни натпревари во сезоната игравме со болки од минатата. Разговаравме пред мечот и ѝм кажав: Сакате ли да играте против Интер? Ако сакате тогаш излезете и победете го Реал. Момците одиграа фантастично“, изјави Пеп.

Гвардиола посебни пофалби имаше за Бернардо Силва кој ги постигна двата гола во првото полувреме.

„Бернардо Силва дефинитивно е еден од најдобрите фудбалери кои некогаш сум ги видел во животот“, истакна Гвардиола.

Сезонава Манчестер Сити има прилика за тројна круна бидејќи е блиску до трофеј во Премиер лигата, а ќе играат финале и во ФА Купот.