Томас Милер има свој фаворит од двомечот помеѓу Реал Мадрид и Манчестер Сити

Фудбалерот на Баерн Минхен, Томас Милер изјави дека би сакал Реал Мадрид да се пласира во финалето од Лигата на шампионите, пренесува германски „Кикер“.

Баерн беше елиминиран во четвртфиналето од Лигата на шампионите од екипата на Манчестер Сити. Реал и Сити минатата недела одиграа во Мадрид без победник 1:1, а реваншот на програмата е за два дена во Англија.

„Би сакал Реал Мадрид да се избори за финале во Лигата на шампионите. Навивам за Реал во овој натпревар поради Давид Алаба. Кога во прашање е фудбалот, сметам дека двата тима се одлични и дека играат атрактивен и добар фудбал. Ќе биде голем натпревар во среда, но повеќе би сакал Реал да игра финале“, изјави Милер.

Во второто полуфинале играат градските ривали Интер и Милан. Интер во првиот натпревар славеше со 2:0, а реваншот ќе биде одигран во вторник на „Сан Сиро“.