Тоти: Се обидов да ги донесам Роналдо и Ибра во Рома

Франческо Тоти е вистински пример за верност и љубов кон својот клуб, па целата своја кариера ја помина во Рома.

Иако кариерата ја заврши со само една титула шампион на Италија, сепак Тоти ги одбиваше понудите на потрофејните клубови и остана на „Олимпико“.

Тоти од друга страна се обидувал да ангажира големи имиња да дојдат во Рома. Во разговор за Ла Република откри дека ги посакувал Кристиано Роналдо и Златан Ибрахимовиќ.

„Секогаш говорев дека се големи играчи, вистински шампиони, потребни за освојување на трофеи. Се надевав дека Роналдо, Ибрахимовиќ и уште некои други великани ќе дојдат во клубот, но за жал имавме финансиски ограничувања и не можевме премногу да трошиме. Пробав да доведам големи имиња во Рома“, открива Тоти.

Тоти ја заврши кариерата со 786 настапи и 307 голови за Рома, а покрај Скудето освои уште и две титули во италијанскиот Куп.