Понудата е пред Пандев: Ако сакаш да играш на ЕП остани со нас!

Капитенот на репрезентацијата на Македонија Горан Пандев има понуда да остане во Италија во редовите на неговиот сегашен клуб Џенова.

Повеќе пати претходно Пандев изјавуваше дека сака да ја заврши кариерата со настап со Македонија на едно големо натпреварување. Европското првенство кое требаше да се одигра ова лето, а се премести за другото поради коронавирусот ќе биде можност за тоа. Меѓутоа постои и можност македонската фудбалска икона да стави крај на кариерата по завршувањето на актуелната сезона.

Претседателот на Џенова за италијанските медиуми потврди дека му понудил на Пандев да остане и во наредната сезона.

„Кога се сретнавме последен пат му кажав: Сакаш ли да играш на Европско Првенство? Тогаш остани тука колку сакаш. Пандев е еден од најсериозните и најпрофесионалните играчи кои што сум ги сретнал. Навистина се приврзав за него, остави неизбрилшив траг врз нас“, изјави претседателот на Џенова, Енрико Прециози.

Пандев во сезоната 2019/2020 одигра 22 натпревари и постигна седум гола.