Крај на сагата, Осимен става потпис

Напаѓачот на Наполи и најдобар стрелец во Серија А, Виктор Осимен е на добар пат да го продолжи договорот со италијанскиот шампион.

Осимен блесна минатата сезона и со своите настапи му донесе Скудетото на Наполи, но и интерес од многу европски гиганти.

Наполи не сакаше да слушне за продажба за сума под 150 милиони евра и веднаш се обиде да го „блиндира“ со нов договор.

Последните информации од Апенините се дека двете страни постигнале договор за продолжување на соработката и агентот на Осимен денес пристигнува во Неапол за да се договорат последните детали.

Осимен ќе стави потпис на нов договор до 2027 година и ќе добие значително зголемување на платата па по сезона ќе заработува 6,5 милиони евра плус бонуси.