И кога не е во клубот, работи за него: Карачиќ го препорачал Вардар на Вујин!

Maрко Вујин е новото засилување за Вардар на бековската позиција и тој во тимот на Михајло Михајловски доаѓа како големо име.

Во интервју за српски „Журнал“ тој раскажа како дошло до соработка со Вардар.

„Во последните три години Вардар два пати беше шампион на Европа и едвај чекам да заиграме во полна сала. Со Кил два пати гостував кај Вардар и се сеќавам во каква атмосфера игравме. Таму се „дише“ за ракомет. Го избрав Вардар да биде моја последна етапа во кариерата, се надевам и посакувам спортско здравје“.

„Додека преговаравме неколку пати разговарав со претседателот Михајловски и мојот впечаток за него е позитивен. Разговарав и со играчи кои играле во Вардар кога претходно беше во клубот. Игор Карачиќ ми кажа многу позитивни работи за клубот, градот, салата, условите…Влегувам во оваа авантура гладен за успеси и победи“, изјави Вујин.