„Тоа што го направивме за Ѓоковиќ пред неколку години, сега ќе го направиме за Синер“

Враќањето на Јаник Синер на теренот е уште многу далеку, околу 2,5 месеци, но во Италија тоа секогаш е една од темите на денот. На најдобриот тенисер во светот му истекува суспензијата на почетокот на мај, а првиот турнир на кој ќе настапи ќе биде мастерсот во Рим.

– Подготвуваме тврдина за него на Форумот Италикум – вели Клаудио Бинаги, претседател на Италијанската тениска федерација и го споредува со вестерните, а неговите зборови ги пренесува „Тутоспорт“. – Како Форт Апачи. Тоа ќе биде место каде што ќе може на мир да се подготвува за натпреварите, да се опушти и да троши помалку енергија. Ќе му овозможиме простор само за него, бидејќи веруваме дека ќе му биде неопходно. Така направивме и со Новак Ѓоковиќ пред неколку години.

Бинаги вели дека светскиот број 1 повеќе не може да живее во татковината.

– Кога Јаник е во Италија, го запираат на секој чекор. Навивачите бараат фотографии и автограми, а тој нема мир од нив.

Во Италија имаат големи планови за нивниот најголем турнир.

– Ќе го прошириме стадионот, целта е да имаме повеќе од 400 илјади посетители.

Тоа не е единствената вест за број 1. Наводно, веќе избрал тренер кој на крајот од годината ќе го замени Дарен Кејхил кој веќе го најави своето заминување.

– Јас сум 90 отсто сигурен дека Јаник веќе го избрал – вели Паоло Бертолучи, поранешен италијански ас, во разговор со Адриано Паната, победник на Ролан Гарос во 1976 година, во еден подкаст.