Тиквеш ќе биде казнет, ФФМ отвори постапка

Фудбалската федерација на Македонија денеска одржала седница на која биле донесени одлуки во врска со натпреварите во Кавадарци и Кратово.

Како што соопштува ФФМ, на дуелот меѓу Тиквеш и Арсими, одигран на 3 мај 2026 година во Кавадарци, е констатирано сериозно нарушување на редот од страна на домашната публика. Навивачката група „Лозари“ користела пиротехнички средства, при што 38 пати биле фрлани на теренот. И покрај две предупредувања преку разгласот, инцидентите продолжиле.

Дополнително, на трибините бил истакнат и транспарент со навредлива содржина упатена кон ФФМ, кој подоцна бил отстранет по интервенција на официјалниот спикер.

Поради овие случувања, против клубот е отворена дисциплинска постапка, а случајот е предаден на Дисциплинската комисија при ФФМ.

Претходно во текот на денот, првиот човек на Тиквеш, Митко Јанчев, се огради од критиките и навредите на навивачите упатени кон федерацијата.