Португалскиот фудбал е завиен во црно по смртта на 25-годишниот Кевин Кастро, поранешен фудбалер на Вест Бромвич Албион. Кастро се сруши во саботата за време на пријателскиот натпревар на неговиот Реал Спорт Клуб, познат и како Реал Масама, против португалскиот прволигаш Естрела Амадора.
Трагедијата се случи на стадионот Сеишас во Малвеира. Се играше само десеттата минута од натпреварот кога младиот играч од средината одеднаш остана неподвижен на теренот. Медицинскиот тим реагираше веднаш откако стана јасно дека се работи за сериозна ситуација. На помош притоа пристапи и клупскиот доктор на Естрела Амадора и започна реанимација.
При обидите за спасување беше користен и дефибрилатор кој го имаше со себе медицинскиот тим на Естрела. Истовремено беше повикана португалската Национална служба за итна медицинска помош, позната како INEM. Кастро беше пренесен во најблиската болница по укажаната помош. За жал, лекарите не успеаја да го спасат неговиот живот, а веста за неговата смрт беше брзо потврдена од Реал Спорт Клуб. Натпреварот беше прекинат по драматичните случувања. Причината за смртта на младиот фудбалер засега не е официјално објавена.
“Со длабока тага и неизмерна болка Реал Спорт Клуб ја информира јавноста за смртта на Кевин Кастро, играч и мил член на нашето спортско семејство”, објави неговиот клуб.
Учество во игри на среќа е дозволено за лица со 18+ години. Играј одговорно!