Сензација во атлетиката: Падна светскиот рекорд на 110 метри! (Видео)

Американскиот атлетичар ЏаКоби Тарп го постави новиот светски рекорд во трка на 110 метри со пречки во Јуџин, Орегон.

На универзитетското првенство на САД, дваесетгодишниот атлетичар забележа време од 12,75 секунди, што е за пет стотинки побрзо од претходниот рекорд од 12,80, од 2012 година, на неговиот сонародник Аријес Мерит.

„Бев свесен дека имам потенцијал, но не верував дека ќе го постигнам ова на толку значајно натпреварување. Чувствував дека трчам брзо, а кога го видов времето, останав без зборови“, изјави атлетичарот од Универзитетот Оберн, кој претходно никогаш не истрчал под 13 секунди.

Младиот Американец лани во септември се пласира шести на 110 метри со пречки на Светското првенство во Токио.

Во јавноста стана попознат кога на 60 метри со пречки постигна време од 7,32 секунди, трет најдобар резултат во историјата.

🌎World record for Ja’Kobe Tharp and it’s only the PRELIMS! 😳 pic.twitter.com/hLPrKBqINC

— Travis Miller (@travismillerx13) June 11, 2026