„Роналдо мислеше само на жени и забави“

Познатиот италијански тренер Фабио Капело се присети на своето време во Реал Мадрид, изнесувајќи остри критики кон некои од ѕвездите кои ги тренирал, особено кон Роналдо и Антонио Касано, опишувајќи ги како изгубени таленти и лоши примери надвор од теренот.

Кога станува збор за Роналдо Назарио, Капело беше многу критичен, нарекувајќи го негативен лидер во екипата.

– Тој беше негативен лидер. Не тренираше правилно и не ги мотивираше своите соиграчи. Размислуваше само за жени, забави и се здебели – изјави Капело.

Капело исто така откри разговор со тогашниот претседател на Милан, Силвио Берлускони, кој всушност доведе до заминувањето на бразилскиот напаѓач од Мадрид.

– Берлускони ме повика и праша: ‘Каков е Роналдо?’. Му одговорив: ‘Претседателе, добар е. Но не е добар пример, постојано е во дискотеки, се здебели, мисли само за жени’. Веќе следниот ден во “Газета”: ‘Роналдо во Милан’ – раскажa тренерот, кој исто така се присети дека го прашал играчот за неговата тежина по пристигнувањето во Мадрид:

– Кога Роналдо пристигна во Мадрид, го прашав: ‘Колку тежеше кога го освои Светското првенство?’. 84 килограми. ‘А сега?’. 94 – рекол низ смеа.