Реља Обриќ не ја остава отворена вратата за Србија. Младиот фудбалер на Аталанта, кој е роден во Белград, својата репрезентативна иднина ја гледа исклучиво во Словенија, а сега доби можност да направи и чекор кон сениорскиот национален тим.
Селекторот Боштјан Цесар го повика 19-годишниот дефанзивец за натпреварите со Швајцарија и Македонија. За Обриќ тоа е продолжение на патот низ словенечките младински селекции, за кои досега собра 36 настапи и постигна еден гол.
Во разговор за словенечкиот портал „Екипа“, тој објасни дека не размислува за промена на репрезентацијата. Благодарен е за шансата што ја добил од Словенија и за довербата на федерацијата и тренерите. Секој нов повик, според неговите зборови, го радува затоа што настапува за луѓе кои веруваат во него, а таа доверба е заемна.
Неговата врска со Словенија има и семејна основа: баба му е Словенка од Идрија. Првиот контакт со словенечкиот фудбал се случил на турнир во Стара Пазова, додека со Партизан играл против Кршко, Марибор и Олимпија. Тогаш му пристапил Жикица Вуксановиќ од Марибор и го прашал дали би сакал да игра за Словенија.
Обриќ првпат се приклучил на словенечка репрезентативна селекција на 14 години. Раскажа и дека за време на пандемијата на коронавирусот Партизан не му дозволувал да замине на репрезентативните собири. Подоцна настапувал за селекциите до 15 и до 16 години, а дебито го имал против Полска.
Повикот за сениорите доаѓа по пробивот во првиот тим на Аталанта. Повредите во составот, меѓу кои и онаа на Сеад Колашинац, му отворија простор да ја покаже својата вредност. Против Фрозиноне, Фиорентина и Парма одигра по цели 90 минути и се наметна како опција за составот.
Пред преселбата во Италија играше за Милутинац и за Партизан, каде што беше капитен во младинските категории. Аталанта го доведе во 2023 година за 135.000 евра, а по клупската шанса сега го очекува и можноста за прв настап во сениорскиот дрес на Словенија.
Фото: Index.hr
Учество во игри на среќа е дозволено за лица со 18+ години. Играј одговорно!