Патот до атлетските натпревари на Олимписките игри во Лос Анџелес 2028 ќе има поинакви правила. Светската атлетика ги објави квалификациските услови, а една од најважните промени е поголемото учество на светските ранг-листи при распределбата на местата.
Наместо досегашниот рамноправен сооднос меѓу двата начина на квалификација, сега се очекува 40 отсто од атлетичарите да обезбедат настап преку исполнета норма, а преостанатите 60 отсто преку рангирањето.
Но, ниту постигнатиот норматив нема безусловно да гарантира учество. Доколку во одредена дисциплина повеќе натпреварувачи ја исполнат нормата отколку што има расположливи места, ќе одлучуваат најдобрите резултати остварени во квалификацискиот период. Во таков случај нема да се доделуваат дополнителни места преку ранг-листата.
Календарот за исполнување на условите е поделен според дисциплините:
- За маратонот, периодот трае од 1 ноември 2026 до 30 април 2028 година.
- За десетобојот, седмобојот, брзото одење, штафетите и трката на 10.000 метри, резултатите ќе се сметаат од 19 декември 2026 до 18 јуни 2028 година.
- За сите преостанати дисциплини, квалификациите почнуваат на 19 јуни 2027 и завршуваат на 18 јуни 2028 година.
При одредувањето на нормативите биле анализирани резултатите од светските првенства во 2022, 2023 и 2025 година, како и од Олимписките игри во Париз во 2024 година. Во пресметките влегле и движењата на резултатите по дисциплини и очекуваниот напредок.
За српските претставници, конкретните предизвици веќе се јасни. Ангелина Топиќ во скок во височина ќе има норма од 1,97 метри, додека за Адриана Вилагош и Марија Вученовиќ во фрлање копје границата е поставена на 63,80 метри.
Особено висок праг има Лука Бошковиќ во скок во далечина: потребни се 8,30 метри, должина која од српските атлетичари досега ја има достигнато само Ненад Стекиќ. Нов олимписки настап посакуваат и Милица Гардашевиќ во скок во далечина и Армин Синанчевиќ во фрлање ѓуле, а ранг-листите остануваат алтернативен пат до Лос Анџелес.
Олимписката програма ќе содржи по 23 дисциплини во машка и во женска конкуренција, плус две мешани штафети. Новитет ќе биде мешаната штафета 4х100 метри, која ќе го има своето олимписко деби, покрај веќе присутната мешана штафета 4х400 метри.
Фото: Telegraf
Учество во игри на среќа е дозволено за лица со 18+ години. Играј одговорно!