„Лудило“: Билетите за финалето во Лигата на шампионите се продаваат и по – 30.000 евра!

Во моментов, вистинско лудило владее околу билетите за финалниот натпревар од Лигата на шампионите.

Десет дена пред финалето каде што силите ќе ги одмерат Интер и Париз Сен Жермен, интересот за влезниците за овој значаен натпревар е многу голем.

Присуството на натпревар каде вашиот тим има можност да создаде историја е уникатно искуство, па затоа не изненадува што навивачите од целиот свет сакаат да бидат дел од овој настан.

Поради огромната побарувачка, УЕФА реши да организира лотарија за да се надмине проблемот – добитниците можат да купат билети по цени од 70 до 6.900 евра, што е цената на билетот за ВИП ложата.

Сепак, проблемот не е решен целосно бидејќи Алијанц арената во Минхен, каде што ќе се игра финалето, има капацитет од околу 65.000 седишта, додека за билети на веб-страницата на УЕФА се пријавиле околу 400.000 луѓе.

Тоа значи дека над 300.000 луѓе остануваат без билети. Затоа, некои од оние кои среќно успеале да стигнат до билет одлучиле да ги препродаваат за да остварат значителен профит.

На интернет може да се види дека некои продаваат билети за ложа по цена од 31.000 евра, додека најевтините билети ги препродаваат по 3.000 евра, иако ги купиле за само 70 евра.

Не се сомнева дека некои жестоки навивачи кои можат да си го дозволат тоа ќе ги купат овие билети, бидејќи тоа е единствениот начин да го гледаат својот тим во овој историски меч.