Нотингем Форест му даде четири гола на Арсенал и го исфрли од ФА Купот

Фудбалерите на Нотингем Форест го исфрлија Арсенал од ФА Купот откако денеска славеа на домашен терен со 4:2.

Домашниот тим дојде до водство после 20 минути игра и тоа со погодок на десниот бек Личај. Сепак, три минути подоцна Мертесакер ги врати работите на почеток. Пред самиот крај на првиот дел Нотингем повторно успеа да дојде до водство, а повторно стрелец беше Личај. Овојпат тоа го направи на спектакуларен начин, а Давид Оспина само со поглед ја проследи топката кон мрежата.

Во второто полувреме видовме многу возбудувања и голови. Се започна во 64. минута кога Бреретон постигна гол од пенал и ја зголеми предноста на 3:1. Сепак, гостите се вратија во натпреварот кога голема грешка направи голманот на домаќините, а тоа го искористи Дани Велбек и намали на 3:2.

Нотингем ја потврди победата со погодок од пенал во 85. минута од натпреварот. Домашниот тим натпреварот го завршија со играч помалку бидејќи црвен картон заработи Ворал во 89. минута.