Споменот на Андреј Лазаров доби и книжевна форма. Во Мултикултурниот центар во Кочани беше претставена книгата „Бојот се бие во срцето на јунакот“, во која авторот Марјан Гијовски го раскажува животот на фудбалерот преку сеќавањата на луѓето блиски до него.
Промоцијата имаше и личен, емотивен белег: покрај книгата, посетителите можеа да видат дресови, копачки, топка и фотографии на Лазаров. Предметите од неговото фудбалско секојдневие ја надополнија приказната за младиот играч кој го загуби животот во пожарот во кочанската дискотека „Пулс“.
Гијовски немал лично познанство со Андреј. Материјалот за книгата го собирал преку разговори со луѓе од неговиот приватен живот и од фудбалот, поврзувајќи ги нивните сведоштва во портрет што не се ограничува само на спортската кариера.
Лазаров беше роден во Кочани на 8 септември 1999 година и настапуваше во средниот ред. Почина на 16 март 2025 година, на 25-годишна возраст. Неговиот последен клуб беше Шкупи, а претходно играше за Работнички и Тиквеш, како и за хрватските Рудеш и Горица.
Фудбалските клубови во кои остави трага веќе презедоа чекори за зачувување на неговото име. Шкупи го повлече дресот со број 77, додека Тиквеш во негова чест го повлече бројот 16. Работнички и Тиквеш подоцна договорија и натпревар посветен на својот поранешен фудбалер.
Книгата сега им се придружува на тие одбележувања, со поинаков пристап кон неговото наследство: наместо преку број на дрес или натпревар, животот на Лазаров е зачуван преку спомените на оние што го познавале.
Фото: Архива
Учество во игри на среќа е дозволено за лица со 18+ години. Играј одговорно!