Поразот од Хјустон остана во сенка на здравствените проблеми на Стеф Кари. Голден Стејт загуби со 115:108, но поголема грижа за Вориорс е состојбата на нивниот најдобар кошаркар, кој мораше да се повлече уште во првата четвртина.
Кари почувствувал болка на десната страна од стомакот само неколку минути по почетокот. Останал на паркетот и се обидел да игра, но по погодена тројка од речиси девет метри повторно имал проблеми и побарал измена.
За време на тајмаутот разговарал со Стив Кер, а потоа заминал во соблекувалната. По лекарскиот преглед, клубот соопшти дека нема да се врати во игра. Во второто полувреме бил испратен на магнетна резонанца, додека тежината на повредата сè уште не е позната.
Кер по натпреварот не можеше да даде конкретен одговор за состојбата на својата ѕвезда. Потврди дека загриженоста е голема и пренесе дека Кари му ја опишал болката како нешто што досега не го почувствувал.
Неизвесноста доаѓа во период во кој Голден Стејт имаше осум победи во низа пред дуелот со Рокетс. Кари сезонава постигнува просечно 30,6 поени за 28,6 минути, па евентуална подолга пауза би оставила голема празнина во нападот.
Дрејмонд Грин, сепак, верува дека тимот сега има повеќе решенија отколку минатата сезона. Според него, атмосферата е подобра, екипата појасно го препознава својот идентитет, а Јаксел Лендеборг може да создаде предност со топката. Грин го истакна и напредокот во играта на Брендин Поџиемски како дополнителна причина за оптимизам.
Вориорс моментно имаат биланс од осум победи и четири порази. Во двете средби без Кари оваа сезона забележаа по една победа и пораз. Минатата сезона, пак, победија само 13 пати во 39 натпревари што ги пропушти нивниот лидер.
Фото: Index.hr
Учество во игри на среќа е дозволено за лица со 18+ години. Играј одговорно!