Динамо Загреб се простува од еден од своите најзначајни фудбалери: Жељко Матуш почина на 91-годишна возраст во Швајцарија, каде што живееше со децении. Зад него остануваат четири клупски трофеи со загрепскиот тим, европско финале и олимписко злато со репрезентацијата на Југославија.
Матуш го носеше дресот на Динамо од 1954 до 1965 година и запиша вкупно 428 настапи. Беше долгогодишен капитен и фудбалер кој можеше да одговори на повеќе задачи во средниот ред, и како организатор на играта и во подефанзивна улога.
Со загрепскиот клуб стана првак на Југославија во 1958 година, а Купот го освои во 1960, 1963 и 1965 година. Посебно поглавје од неговата кариера е настапот во финалето на Купот на саемските градови во 1963 година, кога со капитенската лента го предводеше Динамо против Валенсија.
На тој европски пат загрепчани го совладаа Порто на гости, го елиминираа Баерн со победа од 4:1 во Минхен, а во полуфиналето двапати беа подобри од Ференцварош. Валенсија, сепак, ги запре во борбата за трофејот.
Значајни успеси оствари и на репрезентативната сцена. За Југославија одигра 13 натпревари и постигна пет гола, а во 1960 година освои две големи медали: сребро на Европското првенство во Париз и злато на Олимписките игри во Рим.
Во олимпиското финале против Данска беше стрелец за водство од 2:0, во натпревар што Југославија го доби со 3:1. Две години подоцна беше дел од селекцијата која на Светското првенство во Чиле стигна до полуфиналето и заврши на четвртото место.
Матуш беше и последниот жив учесник во дуелот меѓу Хрватска и Индонезија, одигран во Загреб на 12 септември 1956 година. Го постигна првиот гол во победата од 5:2, во единствениот натпревар на хрватската репрезентација во периодот од 1945 до 1990 година.
Роден на 9 август 1935 година во Доња Стубица, фудбалските почетоци ги имаше во родното место, а потоа играше за Загорец од Крапина и Текстилац од Орославје. По заминувањето од Динамо ја продолжи кариерата во Швајцарија, во Јанг Фелоус и Цирих.
Во Швајцарија остана и по завршувањето на играчката кариера, работејќи како стоматолог. Пензионерските денови ги минуваше покрај Циришкото Езеро. Динамо со клупска објава му оддаде почит на својот поранешен капитен и изрази сочувство до неговото семејство и пријателите.
Фото: Index.hr
Учество во игри на среќа е дозволено за лица со 18+ години. Играј одговорно!