Кими Антонели ја освои Формула 1, но за Тото Волф неговиот најголем квалитет не се мери само со брзината. Шефот на Мерцедес го посочи новиот светски шампион како доказ дека до врвот може да се стигне и со скромност, почит и коректен однос кон другите.
Италијанецот ја обезбеди титулата на трката во Мексико Сити, на четири трки пред крајот на сезоната. Со само 20 години и во својата втора сезона во шампионатот, тој стана најмладиот светски првак во историјата на Формула 1.
По трката, Волф пред новинарите зборуваше за вредностите што Антонели ги внесува во спортот, испраќајќи и јасна критика кон дел од неговите конкуренти.
„Моделот на возач кој сака да победи по секоја цена, кој е себичен и безмилосен за сопствена корист, веќе е минато. Имаме шампион што претставува скромност, чесност, лојалност и почит“, порача Волф.
Според првиот човек на Мерцедес, младиот Италијанец не треба да биде пример само за талентите во пониските категории, туку и за оние во Формула 1 што сметаат дека сè им следува.
„Нека го погледнат оние што постојано се жалат преку радиото, приговараат и се судираат. Нека го погледнат ова 20-годишно момче и нека размислат што можат да подобрат кај себе“, истакна Волф.
Тој додаде дека токму такви возачи би сакал да гледа во иднина, споменувајќи ги и претседателот на ФИА, Мохамед бен Сулајем, и првиот човек на Формула 1, Стефано Доменикали.
„Талент имаат сите. Но, треба да бидеш и добар човек. Кими покажа дека можеш да ги победиш сите и притоа да останеш добар човек“, беше пораката на Волф.
За потврда на титулата, на Антонели во Мексико му беше доволен пласман меѓу првите девет. Тој направи повеќе од потребното и заврши трет, зад победникот Макс Верстапен и Луис Хамилтон.
Друштвото на подиумот дополнително ги нагласи неговите идни амбиции: Хамилтон има седум светски титули и го дели рекордот, додека Верстапен е четирикратен шампион. Антонели веќе размислува како да ја надгради првата круна.
„Ова е само почеток. Титулата е нова појдовна точка од која треба да продолжам да напредувам и да се обидувам да освојувам шампионати. Беше неверојатно да бидам на подиумот со Макс и Луис и се надевам дека нè чекаат уште многу битки“, изјави тој за Скај Спортс Ф1.
Патот до овој успех не беше без сомнежи. Во дебитантската сезона, особено за време на европскиот летен дел, неговите слаби резултати отворија прашања дали Мерцедес прерано му го довери местото што се ослободи со заминувањето на Хамилтон во Ферари.
Антонели призна дека критиките му дале дополнителен мотив, но и дека во одредени моменти од минатата година навистина изгледало како сè уште да не е подготвен за Формула 1.
Токму тешките настапи и притисокот, според него, биле важни за созревањето. Тие му помогнале подобро да реагира оваа сезона, иако нагласува дека и понатаму прави грешки и има простор за напредок.
Италијанецот смета дека директниот влез во Мерцедес, со целото внимание што го носи таквото место, го забрзал неговиот развој многу повеќе отколку што би се случило во помал тим.
Фото: Sky Sports
Учество во игри на среќа е дозволено за лица со 18+ години. Играј одговорно!