Пораката на Никола Јокиќ до навивачите што му свират на Денвер предизвика остар одговор од Чарлс Баркли. Поранешниот НБА-ас и актуелен кошаркарски аналитичар смета дека српскиот центар погрешно гледа на односот меѓу играчите и публиката.
Јокиќ реагираше по поразот од Голден Стејт, кога незадоволството од резултатот беше проследено и со свирежи од трибините. Неговата порака беше дека оние што доаѓаат за да му свират на сопствениот тим не треба да присуствуваат на натпреварите.
За Баркли, пак, навивачката поддршка не значи дека кошаркарите се ослободени од критика. Тој нагласи дека публиката плаќа за да ги гледа играчите, ги следи и ги сака, но има право да покаже незадоволство кога настапот е лош.
Како пример го посочи дуелот меѓу Филаделфија и Кливленд. Според неговото објаснување, Филаделфија добила жестоки свирежи во првото полувреме, а кога екипата се вратила во натпреварот, истите трибини повторно почнале да ја бодрат.
„Постојано им велам на играчите дека не смеат да бидат толку чувствителни. И со нас, новинарите, е исто: кога играш добро, те поддржуваме, кога играш лошо, те критикуваме. Ако не разбираш како функционира тој однос, тогаш едноставно си глуп“, порача Баркли.
Јокиќ, од друга страна, остана на својот став. Центарот објасни дека во кариерата играл и во многу понепријатни атмосфери, како и пред различен број гледачи, но не се навикнал домашната публика да ја исвиркува својата екипа.
„Стојам зад тоа што го кажав. Не сум навикнат навивачите да му свират на сопствениот тим. Дома никогаш не сум го слушнал тоа. Веројатно се случува и таму, но за мене тоа не се вистински навивачи“, изјави Јокиќ.
Фото: Wright-Patt AFB / Wikimedia Commons, Public domain
Учество во игри на среќа е дозволено за лица со 18+ години. Играј одговорно!