Стефановиќ збесна по поразот на Игокеа: „Ова е надвор од секоја памет“

Игокеа доживеа нов пораз, откако Цедевита Олимпија славеше со 93:81 на натпревар кој привлече внимание по огромниот број слободни фрлања. На средбата беа изведени дури 84 пенали, а токму тој детал беше во фокусот по завршувањето на дуелот.

Тренерот на тимот од Лакташи, Ненад Стефановиќ, не го криеше незадоволството по натпреварот. Тој најпрво му честиташе на противникот за победата, но јасно порача дека мечот бил многу необичен.

„Им честитам на Цедевита Олимпија за победата. Во ова лудило што се случуваше, тие подобро се снајдоа.“

Стефановиќ потоа објасни дека по ваков натпревар тешко може да зборува за кошаркарските работи, затоа што вниманието целосно го презел критериумот и бројот на слободни фрлања.

„По ова, тешко дека можам многу да зборувам за кошарката. Лани се вадеа разни податоци за тоа колку слободни фрлања се шутираат во одредени натпреварувања. Јас ќе ви кажам само едно – во Лакташи, на три натпревари, нашите противници изведоа 109 слободни фрлања.“

Тој повторно се наврати на статистиката и направи споредба со настапите на Игокеа во ФИБА Лигата на шампионите, каде, според него, критериумот бил сосема поинаков.

„Морам да го кажам и овој податок: на два натпревари во ФИБА Лигата на шампионите, нашите два ривали заедно немаа толку слободни фрлања колку што сега имаше Цедевита Олимпија. Не сум сигурен дека до крајот на натпреварувањето во БЦЛ, а имаме уште четири натпревари, нашите противници ќе стигнат до 100 слободни фрлања. Нема да бидат ни толку.“

На крајот, Стефановиќ порача дека е тешко неговиот тим да се приспособува кога во различни натпреварувања се среќава со сосема различен критериум.

„Не знам што да очекуваме на гостувања, ниту како да се приспособиме. Ова е надвор од секоја памет. За нас е многу тешко, затоа што во другите две натпреварувања во кои играме имаме тотално поинаков критериум, на кој веќе успеавме да се навикнеме. Ако вака продолжи, верувам дека до крајот на сезоната ќе рушиме многу рекорди.“

Поразот од Цедевита Олимпија дополнително ја зголеми фрустрацијата во таборот на Игокеа, а изјавата на Стефановиќ јасно покажува дека во центарот на вниманието по овој меч не беше само резултатот, туку и начинот на кој се дојде до него.