Мирчевски: Пелистер е бренд, се надевам „Чкембари“ ќе ми простат за трансферот во Вардар

Пелистер денеска и официјално го претстави Мартин Мирчевски како ново засилување за претстојната сезона, а по враќањето во матичниот клуб 29-годишниот офанзивец испрати порака до навивачите и ја истакна својата желба да помогне во враќањето на битолскиот тим во најсилната конкуренција.

Мирчевски, кој е дете на Пелистер, во текот на кариерата настапуваше и за Вардар, а токму на тој период се осврна во своето прво обраќање по потпишувањето на договорот.

„Како играч ќе го дадам својот максимум за да му помогнам на клубот повторно да расте и да се развива во вистинската насока. Ми се допадна проектот што ми беше претставен и верувам дека, ако сите работиме професионално, Пелистер многу брзо ќе се врати таму каде што му е местото“, изјави Мирчевски.

Тој упати и порака до навивачката група „Чкембари“ и до битолската јавност, барајќи разбирање за неговата одлука во минатото да го облече дресот на Вардар.

„Се надевам дека Чкембари и цела Битола ќе ми простат за мојот трансфер во Вардар. Би сакал да ставиме точка на минатото и сите заедно да се радуваме на секоја победа и на секој успех на Пелистер“, порача новото засилување.

Мирчевски нагласи дека интересот на клубот мора да биде над сè и дека главната цел е брзо враќање во Првата македонска фудбалска лига.

„Пелистер е име, презиме и бренд во македонскиот фудбал и е поголем од сите нас. Без разлика на разочарувањата и емоциите од минатото, време е тие да останат зад нас. Нашата заедничка цел е јасна, експресно враќање во Првата лига. Само обединети можеме да ја оствариме таа цел“, истакна Мирчевски.

Минатата сезона Мирчевски го носеше дресот на Силекс, а во кариерата собираше искуство и надвор од Македонија во екипите на ТСЦ и Железничар.