Реал Мадрид со последниот чекор пред да го претстави Мурињо

Набргу по веста за неуспешната понуда за Хулијан Алварес, од Реал Мадрид информираа дека официјално се разделуваат со Алваро Арбелоа, кој беше привремен тренер на првиот тим во изминатата сезона.

Ова е и последната формалност пред очекуваното доаѓање на Жозе Мурињо.

Во соопштението за Арбелоа, клубот не прецизира дали стручњакот ќе остане на друга позиција во структурата, но формулацијата на крајот од изјавата сугерира дека тој може целосно да го напушти Реал Мадрид.

На почетокот на тековната сезона, тој го презеде Реал Мадрид Кастиља, пред да застане на чело на првиот тим во јануари, на средината на кампањата, за да го коригира курсот по отпуштањето на Чаби Алонсо. Во 28-те натпревари, каде што го водеше Реал Мадрид, Арбелоа забележа 18 победи, 2 нерешени и 8 порази. Екипата испадна на осминафиналето за Купот на Кралот од второлигашкиот Албасете, беше елиминирана на четвртфиналето во Лигата на шампионите од Баерн, а во Ла Лига остана далеку зад Барселона.