Поштар во Англија заврши во затвор – вршел нелегални преноси од Премиер лигата!

Поштар од Пемброкшир е осуден на три години затвор затоа што снабдувал скоро 2000 клиенти со нелегални преноси на натпревари од Премиер лигата преку модифицирани Fire Stick уреди. Мајкл Дејвид Бароу (48) водел нелегален IPTV сервис „MB Streams“ пет години, со што заработил над 230 илјади евра, пишува Daily Mail.

Судијата на Крунскиот суд во Свонси забележа се впуштил во „голема комерцијална измама“ водена од „чиста алчност“, иако бил свесен за казната што го чека доколку биде фатен. Според проценките на обвинителството, Бароу причинил загуби од околу шест милиони фунти на телевизиски куќи како „Sky Sports“ и „TNT Sports“.

Обиди за прикривање на нелегалната работа

Бароу ги поттикнувал клиентите да ја прикријат природата на трансакциите, кои се одвивале преку PayPal или директни уплати на неговата банкарска сметка, наведувајќи дека плаќаат за класични или ретро фудбалски дресови.

Полицијата го посетила неговиот дом по пријава до организацијата CrimeStoppers во 2021 година. Му издале наредба да го прекине дејствувањето и го предупредиле за судските случаи каде обвинетите добивале затворски казни.

И покрај предупредувањето, Бароу продолжил со работата и презел чекори да избегне апсење. Инсистирал клиентите да комуницираат со него преку Телеграм, а нови клиенти прифаќал само по препорака на постоечки.

Од нив побарал да користат целосни имиња за да спречи инфилтрација на таканаречени „агенти на Sky“. Поради кршење на правилата за интелектуална сопственост му бил суспендиран и Facebook профилот.

Судењето и пресудата

Ари Алибаи, правник претставник на Премиер лигата, кажа на суд дека Бароу повеќе од четири години испорачувал на над 1800 клиенти апликации и модифицирани Fire Stick уреди. Услугата ја наплаќал околу 120 фунти годишно, што е само дел од цената на легалните провајдери на услуги.

Бароу претходно призна вина за три точки од обвинението за производство и испорака на предмети за користење во измама. Неговата адвокатка, Меган Вилијамс, изјави дека Бароу искрено се кае и прифатил дека она што во 2019 започнало како „погрешна желба“ да им помогне на пријатели и семејство „се претворило во нешто многу поголемо“.

Судијата Пол Томас подвлече дека, иако се занимавал со интернет пиратство, Бароу имал „стабилен приход“ работейки за поштенската служба и дека мотивот за неговите дела била „чиста алчност“. Осуден е на 38 месеци затвор, од кои 40 проценти ќе ги одслужи пред да биде условно ослободен.