Драма на Медведев: Со автомобил низ пустината побегна од воената зона, а кога стигна на границата следеше изненадување

Данил Медведев конечно пристигна во Индијан Велс, но патот до Калифорнија беше сè само не обичен. Рускиот тенисер помина низ вистинска логистичка и животна драма откако остана „заробен“ во Дубаи поради ескалација на конфликтот помеѓу Иран од една страна, и САД и Израел од друга страна.

Откако триумфираше на турнирот во Дубаи, Медведев, неговото семејство и тимот се најдоа во безизлезна ситуација. Поради заедничките воени операции на САД и Израел во Иран, воздушниот простор над ОАЕ беше затворен, а учеството на рускиот ас на турнирот година беше под голем знак прашалник.

Медведев го опиша неверојатниот пат кој вклучуваше преминување граници со автомобил, загубени документи и летови преку три држави, и откри дека единствениот начин да го напуштат Емиратите беше патување по копно до соседен Оман.

– Стигнавме во Оман со автомобил. Некои имаа среќа да стигнат за четири и пол часа, некој возеше девет, а ние патувавме седум часа. Нашиот возач не можеше да го најде својот пасош! Бевме единствените кои ја преминаа границата, а потоа требаше да се вратиме назад во ОАЕ. Го најде пасошот на паркингот, па повторно тргнавме за Оман – раскажа Данил низ насмевка, иако ситуацијата во тој момент не бееше нималку пријатна.

Откако преноќија во Мускат, главниот град на Оман, следеше долгата рута до конечната цел.

– Од Оман летавме за Истанбул, таму минавме ноќ во хотел, а потоа одлетавме за Лос Анџелес. Ако зборувате за сите детали, секако дека е необично. Се чувствувате како во холивудски филм: преминувате граница со други луѓе, првпат посетувате Оман… – додаде рускиот тенисер.

Интересно е што Медведев не беше единствен во оваа авантура. Со него на сличен начин се “евакуирале” и неговите сонародници, Карен Хачанов и Андреј Рубљов.