Главниот тренер на финскиот тим за скијачки скокови, словенечкиот експерт Игор Медвед, беше разрешен од своите должности и мораше веднаш да го напушти олимпискиот камп. Според соопштението на Финскиот олимписки комитет во четвртокот, Медвед е исклучен од Олимписките игри во Милано и Кортина д’Ампецо поради несоодветно однесување што ги прекршува правилата и вредностите на тимот.
Причината за оваа драстична одлука е проблемот со алкохолот. Јане Ханинен, директорот на финската олимписка репрезентација, директно изјави: “Медвед денес си замина дома. Станува збор за прекршување на тимските правила во однос на консумацијата на алкохол, што го сфаќаме многу сериозно. Ова однесување е во целосна спротивност со вредностите на нашата олимписка делегација.”
До кога ќе дишеме отровен воздух!? | Уште еден поткаст
Ханинен објасни за финските медиуми дека инцидентот не се случил за време на тренерските должности, туку во слободното време на тренерот за време на Олимписките игри. Сепак, раководството оцени дека ситуацијата е неодржлива бидејќи сакаат да обезбедат мир за спортистите и останатата струка во критичниот дел од сезоната.
Се огласи и самиот Игор Медвед, кој ја призна одговорноста и изрази жалење: “Направив грешка и навистина ми е жал. Се извинувам на целиот фински тим, спортистите и навивачите. Им посакувам на екипата потребен спокој за да можат да се фокусираат на натпреварите и да продолжат со добрата работа. Не планирам понатаму да се огласувам по ова прашање.”
Директорката на Финскиот скијачки сојуз, Марлена Валтасола, додаде дека за долгорочната судбина на Медвед ќе се одлучува веднаш по завршувањето на Олимписките игри. Засега, приоритет е да се смири ситуацијата и да се обезбедат оптимални услови за скијачите.
Учество во игри на среќа е дозволено за лица со 18+ години. Играј одговорно!