Клоп: Му препорачувам на Реал да биде реалистичен, шансите да го донесе Пеп не се баш големи

Јирген Клоп се осврна на отказот на Чаби Алонсо од клупата на Реал Мадрид, како и на гласините кои го поврзуваат со тој клуб. Во разговор за француската агенција „АФП“, поранешниот тренер на Мајнц, Дортмунд и Ливерпул призна дека веста за Алонсо ја примил со мешани чувства.

Чаби Алонсо, кој во 2024 година го однесе Леверкузен до двојната круна – Бундеслигата и Купот, беше сменет по само половина година, а на негово место беше назначен поранешниот негов сограѓанин Алваро Арбелоа. „Си помислив: ‘Како е возможно?’ А потоа: ‘Секако’. Да, изненаден сум, и не, не сум изненаден“, објасни Клоп, потсетувајќи на случајот на Јуп Хајнкес, кој исто така беше сменет во 1998 година и покрај тоа што ја освои Лигата на шампионите.

Клоп испрати и порака до раководството на мадридскиот клуб за спортското планирање. „Би препорачал, кога ќе отпуштат тренер, да имаат идеја кој ќе биде негов наследник“, рече тој и додаде: „И тоа да биде реалистично. Ако мислат дека можат да го донесат Пеп, би рекол дека шансите не се особено големи.“