Беше еден од најдобрите играчи за средина во Европа: Сега, никој не го сака на 28 години

Тоа што минатото лето изгледаше како одличен потег за Јувентус, заемот на Даглас Луиз (27) во Нотингем Форест, сега се претвора во сериозен проблем за торинскиот клуб. Имено, бразилскиот средишен играч не игра доволно во Премиер лигата, поради што откупот на неговиот договор вреден 28,5 милиони евра е под големо прашање, што го активира алармот во Торино, пишува италијански „Тутоспорт“.

Да потсетиме, договорот помеѓу клубовите вклучуваше плаќање на заемот од 3 милиони евра и обврска за откуп вредна дополнителни 28,5 милиони евра, што низ фиксен износ, што низ бонуси. Сепак, клучниот услов за активирање на откупот беше бројот на настапи – Луиз требаше да одигра минимум 15 натпревари во Премиер лигата со времетраење од најмалку 45 минути.

До денес, Бразилецот собра само пет такви настапи. Тоа е премалку, а како Нотингем сè уште го користи умерено, опцијата за откуп изгледа сè подалечна.

Ситуацијата така се врати како бумеранг за Јувентус, кој сега мора брзо да реагира. Раководството на клубот размислува за нова стратегија: повраток на Даглас Луиз од заемот веќе во јануари. Таа можност станува сè поверојатна ако продолжат преговорите што Форест ги води со Интер околу доведување на Давиде Фратеси.

Во Јувентус се свесни дека 28,5 милиони евра се загрозени и веќе сега работат на наоѓање на ново решение, нудејќи го играчот на други клубови од Премиер лигата, каде што Бразилецот сè уште е многу ценет, но засега никој не покажува голем интерес за него.