Џон Тери размислувал за самоубиство

Легендарниот капитен на Челзи, Џон Тери, откри дека се соочувал со темни помисли откако промаши пенал во финалето на Лигата на шампионите во 2008 година против Манчестер Јунајтед.

Во познатото финале кое се одигра на стадионот „Лужники“ во Москва, Манчестер Јунајтед победи по пенал серија со резултат 6:5, откако регуларниот дел од мечот заврши 1:1. Тери имаше шанса во петтата серија да и донесе титула на Челзи, но неговото подлизнување значеше удар во стативата.

Седумнаесет години подоцна, Тери на подкастот на Рис Мини откри колку му беше тешко во тој момент.

Кога размислувам за тие моменти, посакувам да имав тогаш со кого да разговарам, затоа што се сеќавам како се вративме во хотелот по натпреварот, а јас се наоѓав на 25-от кат во Москва, гледав низ прозорецот и си велев: „Зошто? Зошто?“. Не велам дека ќе скокнев, ако ја имав таа можност, но знаете дека такви мисли поминуваат низ умот во такви моменти, рече Џон Тери.