Струга ја продолжи агонијата на Работнички во Првата лига

Струга оствари значајна победа на гостувањето кај Работнички, славејќи со 3-1 во рамките на 14. коло од Првата македонска фудбалска лига.

Гостите од Струга рано го наметнаа ритамот и уште во 11. минута поведоа преку Стефан Јевтоски, кој одлично реагираше во шеснаесетникот. Убавата игра на стружани ја круниса и Малески, кој по излез еден на еден со голманот Василев сигурно реализираше за водство од 2-0.

Работнички се обиде да се врати во натпреварот и преку Имери неколкупати се закани, но голманот на Струга одлично го зачува својот гол. Сепак, скопскиот тим успеа да намали на 1-2 во 54. минута и да внесе нова динамика во мечот.

Сите дилеми околу победникот ги разреши Шабани, кој во 70. минута стрелаше за конечни 3-1 и потврди ново славје на Струга во првенството.